Plantun de Prouvènço

Pèr coumpara dos planto d'encò nostre

Aeluropus littoralis & Viola canina

Aeluropus littoralis

Poaceae Graminaceae

Noms en français : Dactyle des grèves, Élurope des grèves.

Descripcioun :
Aquéu gramenum trachis majamen dins la sansouiro ounte ié flouris de mai à juliet. Rebalo au sòu e fai proun de fiéu (estouloun) que dounon de ramo que d'ùni se redrèisson. Lis esterlo porton de fueio apignelado sus dos renguiero (distico), verdasso e redo. Lis autro fan d'espigo de 1 à 5 cm, souvent vióuleto, caupan d'espigueto de 4 à 11 flour. Coumpara emé l'espouroubole-pougènt pèr pas s'engana, que ié sèmblo pamens (mai que poun bèn mai).

Usanço :
Couneissèn pas d'usanço particuliero pèr aquelo planto. Escriéure au site se n'en sabès mai.

Port : Erbo
Taio : 10 à 50 cm
Fueio : costo paralèlo
Tipe bioulougico : Geoufite
Cicle bioulougico : Planto renadivo

Gènre : Aeluropus
Famiho : Poaceae
Famiho classico : Graminaceae

Ordre : Poales

Coulour de la flour : Vióuleto
Petalo : ges
Ø (o loungour) enflourejado : 1 à 5 cm
Flourido : Printèms - Estiéu

Sòu : NaCl
Autour basso e auto : 0 à 50 m
Aparado : Noun
Mai à juliet

Liò : Sansouiro - Mar
Estànci : Termoumediterran à Mesoumediterran
Couroulougi : Mediterrano-Touranieno
Ref. sc. : Aeluropus littoralis (Gouan) Parl., 1850

Vióuleto-fèro

Viola canina

Violaceae

Autre noum : Palengo.

Noms en français : Violette des chiens, Pensée jaune.

Descripcioun :
La vióuleto-fèro o di-chin, que trachis dins li pelouso séusouso, èi pas uno di proun coumuno au nostre aleva dins lis Aup marino. Fai partido dóu group de vióuleto sènso rouseto emé de tijo qu'an de long entre-nous. Se recounèis tambèn à sis estipulo pulèu grando e dentado e à soun esperoun jaunas. Li petalo soun pas gaire acoulourido. La subsp. de Prouvènço ié dison ruppii emé soun soun esperoun que mounto.

Usanço :
Li flour de vióuleto soun manjadisso, li meiouro soun li mai perfumado, coume Viola odora o Viola suavis. Soun richo en vitamino C e A.